இந்தப் படத்தின் தலைப்பை மின்சார வாரியமே கூட லைக் பண்ண வாய்ப்பிருக்கிறது. ஏன்? படத்தின் தலைப்பு ட்யூப் லைட்’. சுவிட்சை போட்டால் சில வினாடிகள் லேட்டாக பிக்கப் ஆகும் இந்த ட்யூப் லைட் சமாச்சாரத்தை வைத்துக் கொண்டுதான் நாட்டில் எத்தனை நக்கல் நையாண்டிகள்? நிஜ வாழ்வில் இப்படி நையாண்டி பண்ணும் வார்த்தையாக மாறிப் போன ட்யூப் லைட், ஒரு படத்தின் கதைக்கருவாகவே அமைந்துவிட்டால் எப்படியிருக்கும்?
புதுமுகம் இந்த்ரா நடித்து அவரே இயக்கியிருக்கும் படம்தான் இந்த ‘ட்யூப் லைட்’. ஒருவனுக்கு எந்த விஷயத்தை சொன்னாலும் ஐந்து வினாடிகள் கழித்துதான் அவன் காதிலேயே விழும். அப்படி தாமதமாக விழுவதால் அவன் படும் அவஸ்தைதான் ட்யூப் லைட் என்று ஒரே வரியில் கதையை முடிக்கிறார் இந்த்ரா. படத்தின் தயாரிப்பாளரான ரவி நாராயணன் ஒரு கம்பெனி முதலாளி. அப்படியே சைடில் ஒரு திரைப்படம் எடுக்கலாம் என்று ஆசை வந்து கதைகள் கேட்க ஆரம்பித்தார். சுமார் 80 கதைகள் கேட்டாராம். அந்த நேரத்தில்தான் இந்த இந்த்ரா இப்படியொரு கதையோடு உள்ளே நுழைய…. ட்யூப் லைட் ஆன் ஆகிவிட்டது.
“நம்ம ஊர்ல இப்பவும் சார்லி சாப்ளின் படத்தையும், மிஸ்டர் பீன் படத்தையும் சிறியவர்கள் மட்டுமில்ல. பெரியவங்களும் விழுந்து விழுந்து ரசிக்கிறாங்க. நானே ஹீரோவாக நடிக்கும் இந்தப்படத்தில் மிஸ்டர் பீன் மாதிரி ட்ரை பண்ணியிருக்கேன். பார்க்கலாம் நானா அவரா என்று?” என்றார் இந்த்ரா.
இந்தப்படத்தில் நடித்திருக்கும் எல்லாரும் புதுமுகம். ஒரே ஒரு பழைய முகம் நம்ம ‘முழி’ பாண்டியராஜன்! வில்லனாம்… படத்திற்கே வில்லனாக இல்லாமலிருந்தால் சரி.