சினிமாவில் சம்பாதித்து சினிமாவிலேயே முதலீடு செய்கிற இயக்குனர்களில் ஏ.ஆர்.முருகதாசுக்கும் ஒரு முக்கிய இடம் இருப்பதால், அறிமுக இயக்குனர்களின் ஆதர்ஷ நாயகனாகவும் இருக்கிறார் அவர். முருகரின் லேட்டஸ்ட் தயாரிப்பு (பல வருஷத்துக்கு முன்பே துவங்கப்பட்டிருந்தாலும்) ரங்கூன். கவுதம் கார்த்தி ஹீரேவாக நடிக்கும் இப்படத்தை ராஜ்குமார் பெரியசாமி இயக்கியிருக்கிறார்.
இப்படத்தின் பாடல் வெளியீட்டு விழாவுக்கு வந்திருந்த ஏ.ஆர்.முருகதாஸ் ரங்கூன் ஹீரோயின் சனாவை, இன்னொரு சிம்ரன் வர்ணிக்க…. சனாவின் முகத்தில் சன் பிளவர் பூத்தது!
தன்னிடம் பணியாற்றும் ஊழியர்களை எவன் ஒருவன் பாதுகாப்பாக உணர வைக்கிறானோ, அவனே நல்ல முதலாளி என்பதற்கு முருகதாசை விட்டால் நல்ல உதாரணம் சினிமாவில் இல்லை. தன் உதவி இயக்குனர்களுக்கு அவரே வாய்ப்பளிப்பார். அல்லது வேறொரு ஹீரோவிடமோ, நிறுவனத்திடமோ வாய்ப்பு வாங்கித் தருவார். எல்லாவற்றையும் விட, சம்பந்தப்பட்ட உதவி இயக்குனர்களின் பெற்றோரிடம், உங்க பையனை பற்றிய கவலையை விடுங்க. அவன் சொசைட்டியில் பெரிய இடத்துக்கு வருவான் என்று நம்பிக்கையளிப்பார். இந்த ஒரு நல்ல குவாலிட்டீசுக்காகவே முருகரை நம்பி மொட்டை போடவும் கிளம்புகிறது அசிஸ்டென்ட்டுகளின் மனசு.
ராஜ்குமார் பெரியசாமியும் முருகதாசின் உதவியாளர்தான். வழக்கம் போல உங்க பையனுக்கு நல்ல எதிர்காலம் இருக்கு. டோன்ட் வொர்ரி என்ற நம்பிக்கையை அளித்துவிட்டு, அடுத்ததாக சப்ஜெக்ட் தாவினார் முருகதாஸ். அப்போதுதான் இந்த சிம்ரன் பிளாஷ்பேக்.
நான் அசிஸ்டென்ட் டைரக்டரா வொர்க் பண்ணிட்டு இருக்கும் போது சிம்ரன் மேடத்தை பார்த்து வியந்திருக்கேன். அவங்களை வச்சு படம் பண்ணணும்னு ஆசைப்பட்டிருக்கேன். இப்போ இந்தப்படத்தின் ஹீரோயின் சனாவை பார்த்தால் அப்படியே சிம்ரன் போலவே இருக்கிறார். அவர் இடத்தை இவரும் பிடிக்கணும் என்று வாழ்த்த… இந்த டூப்ளிகேட் சிம்ரன் முகத்தை பார்க்கணுமே….!
சமயங்களில் ஒரிஜனல் தங்க நகையை விட பளபளப்பாக இருக்கும் கவரிங்!