சிரிப்பு வருதுல்ல… வருதுல்ல…? வரட்டும்னுதான் அவரும் சொல்லியிருக்கிறார். ஒரு வகையில் பார்த்தால் அதுவும் சரிதான் என்பதை போலதான் நடக்கிறது அந்த மேட்டர்! வேறொன்றுமில்லை… “விஜய் சேதுபதிக்கு போட்டியே நம்ம ஜி.வி.பிரகாஷ்தான்” என்று இயக்குனர் பசங்க பாண்டிராஜ் பேச, அரங்கமே கைதட்டல்களால் அதிர்ந்தது. ஜி.வி.முகத்தில் கொள்ளாத சந்தோஷம் வேறு. (இருக்காதா பின்னே?)
2016 ம் ஆண்டு அதிக படங்களில் நடித்த ஒரே ஹீரோ நம்ம விஜய் சேதுபதிதான். ஒவ்வொரு வெள்ளிக்கிழமையும் அவருடைய படங்கள் வருகிறதோ என்று டவுட் வருகிற அளவுக்கு வந்து கொண்டேயிருந்தது. அவரே றெக்கை பட விழாவில் அதற்கான மர்மத்தை அவிழ்த்தார். “நான் ஏதோ திடீர்னு நிறைய படங்களில் நடிச்சுட்டேன்னு நினைக்க வேணாம். எல்லாம் முன்னாடியே எடுத்து ரிலீஸ் ஆகாமல் நின்ற படங்கள். வரிசையா இப்பதான் வருது” என்றார். இருந்தாலும் வருஷக்கணக்குப்படி பார்த்தால், நிஜம் அதுதானே?
ஜி.வி.பிரகாஷ் ஹீரோவாக நடித்து பிரசாந்த் பாண்டியராஜன் இயக்கிய ‘புரூஸ்லி’ படத்தின் ஆடியோ வெளியீட்டு விழாவுக்கு வந்திருந்தார் டைரக்டர் பாண்டிராஜ். இவரது சிஷ்யன்தான் இப்படத்தின் இயக்குனர். விழாவில் அவர் பேசியபோது, “இந்த வருஷத்தில் விஜய் சேதுபதிதான் அதிகப்படங்களில் நடித்திருந்தார். அவருக்கு சரியான போட்டி ஜி.வி.பிரகாஷ்தான். அடுத்த வருஷம் முழுக்க இவர் நடித்த படங்கள்தான் நிறைய வரப்போகுது. அவ்வளவு படங்களில் சைன் பண்ணியிருக்கிறார்” என்று சொல்ல, ஒரே கரகோஷம்!
அதே நிகழ்ச்சியில் பேசிய வாலு பட இயக்குனர் விஜய் சந்தர், ஜி.வி.சார் வீட்டை விட்டு வெளியில் வரும்போது ஒரு பேனாவோடுதான் வர்றார். திரும்பி வீட்டுக்குள் நுழையும்போது ஒரு படம் சைன் பண்ணிட்டு போறார் என்று சொல்ல, ஜி.வி.பிரகாஷ் முகத்தில் அவ்வளவு பிரகாசம்.
விழாவில் பேசிய அத்தனை பேரும், ஒரு நாளைக்கு குறைந்தது பதினெட்டு இருபது மணி நேரமாவது ஜி.வி.பிரகாஷ் உழைப்பதாக பாராட்டிவிட்டு போனார்கள்.
சுருண்டு கிடக்க அவர் என்ன மெத்தையா? தமிழ்சினிமாவின் வித்தையாச்சே!
To listen Audio Click below:-
https://youtu.be/QWRIFcGIjLw