முகவரி, ஆறு மெழுகு வர்த்திகள் போன்ற நல்ல படங்களை இயக்கிய வி.இசட் துரையின் அடுத்த படைப்பு (?) ஏமாலி! முதல் எழுத்து தப்பா, அல்லது கடைசி எழுத்து தப்பா? என்பதையெல்லாம் படம் வெளிவந்த பின்புதான் அறிய முடியும் போலிருக்கிறது. ஆனால் ஏமா-லிக்கு நான் போட்ட ஸ்பெல்லிங் கரெக்ட்தான் என்றார் துரை.
படத்தில் வரும் ஒரு பாடலில் முதல் வரியே கே.பு என்று துவங்குவதால், பலருக்கும் டவுட். என்னங்க இப்படி? என்றால், படம் பாருங்க புரியும் என்றார். முன்பு சொன்ன அதே பதில் ரிப்பீட். நாம் கேள்விப்பட்ட வரையில் படம் தாறுமாறு தக்காளி என்கிறார்கள். எந்தளவுக்கு என்றால், இப்படத்தின் வெளிநாட்டு வியாபார விஷயத்தில் பெரும் அதிர்ச்சியாம். ஏன்? ட்ரெய்லரை பார்த்த மலேசியா, சிங்கப்பூர் விநியோகஸ்தர்கள் ‘இந்த படத்தை எங்க நாட்டில் வெளியிடவே முடியாது. ஆளை விடுங்க’ என்று விடு ஜுட் ஆகியிருக்கிறார்கள். அந்த வகையிலேயே 22 லட்சம் தொபுக்கடீர்!
டபுள் மீனிங், ட்ரிப்பிள் பார்வை என்று படத்தை இன்னொரு ஹரஹரமகாதேவகி ஆக்கியிருப்பதாக உள் தகவல்கள் தெரிவிக்கின்றன. ஆனால் டைரக்டர் வி.இசட் துரை அப்படியே மறுக்கிறார் எல்லாவற்றையும். அருமையான நாட் ஒன்றை வைத்துக் கொண்டு படு தில்லாக ஒரு படத்தை எடுத்திருக்கிறேன். கண்டிப்பாக பேசப்படுகிற படமா இருக்கும். யூகங்களின் அடிப்படையில் எந்த முடிவுக்கும் வராதீங்க. இதுதான் துரையின் பதில்.
சமுத்திரக்கனி, சாம் ஜோன்ஸ், அதுல்யா, ரோஷினி என்று புள்ளிகளை கரெக்டாக வைத்திருக்கும் துரை, போட்டிருப்பது கோலமா? அலங்கோலமா? என்பதை அறிந்து கொள்ள பிப்ரவரி 2 வரை காத்திருப்போம்.
