முதல் கேட்ச்சையே தவற விட்ட ரஜினி ரசிகர்கள்! இதானா உங்க டக்கு?

எண்ணி இருபத்து சொச்சம் பேர் இருந்தால் பெரிய விஷயம். தமிழர் விடுதலை படை என்றொரு கட்சியை வைத்துக் கொண்டு, ஊரில் எங்கு சலசலப்பு கேட்டாலும், அங்கு டபாரென குதித்து ‘படீர் திடீர்’ கிளப்பி வருகிறார் ஒரு பெண்மணி. பெயர் வீரலட்சுமி. இவருக்கு இருக்கிற கோதா குபீர் பாய்ச்சல்கள் கூட ரஜினி ரசிகர்களுக்கு இல்லாமல் போய்விட்டதே… இந்த கொடுமையை எங்கு போய் சொல்வது?

இன்று சென்னையில் கூடிய வீரலட்சுமியின் வீரப்படை, ரஜினி வீட்டை முற்றுகையிடக் கிளம்பியது. கோரிக்கை? ‘ரஜினி தமிழரல்ல. அதனால் அவர் தமிழ்நாட்டு அரசியலுக்கு வரக் கூடாது’ என்பதுதான். போகிற வழியிலேயே இவரை கைது செய்து வேனில் ஏற்றிவிட்டது போலீஸ்.

இவரே இப்படி என்றால், ‘ரஜினி மண்டையில் மூளையில்லை’ என்று சொன்ன ஒருவருக்கு எதிராக அட்லீஸ்ட் ஒரு அறிக்கை கூட விடாத ரஜினி ரசிகர் மன்றப்படை, தமிழ் நாட்டில் எப்படி அரசியல் செய்து எப்படி ஆட்சியை பிடிக்கப் போகிறார்களோ?

அண்மையில் ரஜினி பற்றி கடுமையாக விமர்சனம் செய்திருக்கிறார் முன்னாள் நீதிபதி மார்கண்டேய கட்ஜு. நாஞ்சில் சம்பத், வளர்மதி போன்ற ‘தேர்ட் கிரேட்’ அரசியல்வாதிகள் கூட இப்படியெல்லாம் கீழிறிங்கி பேசுவார்களா தெரியாது. ஆனால் “ரஜினிக்கு மண்டையில் ஒன்றுமில்லை” என்று பேசியிருக்கிறார் கட்ஜு.

இதை கேட்ட பின்பும் காதில் வாங்கிக் கொள்ளாது போலவே இருக்கிறார்கள் ரஜினி ரசிகர்கள். கட்ஜூ வீட்டை தேடிக் கண்டு பிடித்து கிலி கிளப்பினால்தானே, ‘யானை வரும் பின்னே… தரை அதிரும் முன்னே’ என்பது தெரிய வரும்?

நீங்கள்லாம் அரசியலுக்கு வந்து… நாட்டை புடிச்சு… வௌங்கிரும்!

பின்குறிப்பு- சிம்புவின் பீப் சாங்குக்கு பேராதரவு தெரிவித்தவர்தான் இந்த கோவில்பட்டி வீரலட்சுமி!