பாலாவும் அமீரும் ஒரே நேரத்தில் ஒன்றாகவே சென்னைக்கு ஓடி வந்தவர்கள்தான். வறுமையை பங்கு போட்டுக் கொண்ட இருவராலும் வசதி வந்தபின் ஒன்றாக இருக்க முடியவில்லை. ஈகோ விட்ட முரட்டுக் குத்து இவர்களின் நட்பை நன்றாக பதம் பார்த்துவிட்டது.
அவன்தான் டைரக்டரா? நான் இல்லையா? என்கிற வெறியோடு அமீர் உருவாக்கிய படம்தான் ராம். பாலாவின் சாயலில் பாதிக்கு மேல் அதில் இருந்தது. அதற்கப்புறம் பருத்தி வீரனில் பாலாவை விட உச்சம் தொட்டார் அமீர். இப்படி இருவரும் தனித்தனியே தத்தமது திறமையை காட்டிக் கொண்டிருந்தாலும், பழைய நட்பை புதுப்பித்துக் கொள்ளவே இல்லை. இப்போதும் எங்காவது பார்த்தால் மட்டும் ஒரு சின்ன புன்னகையோடு கடந்துவிடுவது இருவரது இயல்பு.
மேக்கிங் விஷயத்தில் கிட்டதட்ட ஒன்றாக இருக்கும் இருவரும் ஒரே ஹீரோயினை ஒரே நேரத்தில் அழைப்பது மட்டும் எப்படி இல்லாமல் போகும்? அண்மையில் வெளிவந்த பட்டதாரி படத்தில் நடித்த அதிதி, பார்க்கவும் செம லுக். நடிப்பிலும் குட் லக்! அப்படிப்பட்ட அவரை ஒரேயடியாக கொத்திக் கொள்ள கோடம்பாக்கத்தில் சின்ன போட்டி நிலவினாலும், அமீர் முதலில் அவரை கமிட் பண்ணிவிட்டார். அவர் இயக்கத்தில் உருவாகும் சந்தன தேவன் படத்தில் அதிதிதான் நாயகி. இவருக்கு ஜோடி ஆர்யா.
இந்த நிலையில்தான், தனது புதிய படத்திற்கு ஹீரோயின் தேடிய பாலா, அதிதியை வரவழைத்தாராம். பாலா படத்தில் நடித்த ஒரு நடிகையும் விளங்கியதில்லை என்ற போதிலும், ஆசை ஆசையாக போயிருக்கிறார் அதிதி. நல்லவேளையாக… இவர் அமீர் படத்தில் நடிப்பதை அறிந்து போயிட்டு வாம்மா என்று கூறிவிட்டாராம் பாலா.
அவர் படத்தில் நடிக்க முடியாமல் போனது நல்லதா, கெட்டதா என்று கன்பியூஸ் ஆகிக் கிடக்கிறார் அதிதி. தெரிஞ்சா ஒரு போன் போட்டு சொல்லுங்களேன்…
