மெகா பட்ஜெட் இயக்குனரான ஷங்கர் படத்தில் நடிக்கிற வாய்ப்புதான் இல்லை. அவரால் ஒருமுறை தன் பெயர் உச்சரிக்கப்பட்டால் போதும், அதுவே அங்கீகாரம் என்று நினைக்கிற நடிகர்கள், கோடம்பாக்கத்தில் கொள்ளை பேர் இருக்கிறார்கள். எல்லாரையும் குஷிப்படுத்த வேண்டும் என்றால், ஷங்கர் தினந்தோறும் ஒரு படத்தை பார்த்து தினந்தோறும் ஒரு கருத்தை சொல்ல வேண்டும்.
வளவளவென்று பேசுகிறவர்களை அதற்கப்புறம் ஒருவரும் மதிக்கவும் மாட்டார்கள். பெரிய மனிதர் ஆகிவிட்டால் இவ்வளவு சிக்கல்கள் உண்டு. இருந்தாலும் தமிழில் வரும் முக்கியமான படங்களுக்கு தன் ரீயாக்ஷனை கொடுத்து வருகிறார் பிரமாண்ட இயக்குனர் ஷங்கர். மாநகரம் படத்தை ஷங்கர் பாராட்டிய பின்புதான் தியேட்டரில் கூட்டம் ஏறியது. (அதற்கு முன் மீடியா பூஸ்ட் பண்ணியது வேறு விஷயம்)
அதற்கப்புறம் ஷங்கர் பாராட்டிய படம் என்றால் அது துப்பறிவாளன்தான். படத்தை மிஷ்கினுக்காக பார்த்தாரா, விஷாலுக்காக பார்த்தாரா தெரியாது. ஆனால் வஞ்சனையில்லாமல் இருவரையும் பாராட்டியிருக்கிறார் ஷங்கர்.
துப்பறிவாளன் அபாரம். மிஷ்கினின் வித்தியாசமான ஸ்டைலில் விஷாலின் நடிப்பும் பாத்திரப்படைப்பும் அருமை. மொத்த படக்குழுவுக்கும் பாராட்டுகள் என்று ட்விட்டியிருக்கிறார் ஷங்கர். இதனால் விஷால் ரசிகர்கள் செம குஷியானதுடன், தாறுமாறாக அந்த ட்விட்டை ரீ ட்விட் பண்ணியும் வருகிறார்கள்.
தமிழகத்தை விட அண்டை மாநிலமான கேரளத்தில் துப்பறிவாளன் பிய்ச்சுகிட்டு ஓடுவதாக கூறுகிறார்கள். இத்தனைக்கும் அங்கு நல்ல மழை!
(ஒருவேளை மழைக்கு ஒதுங்கிட்டாய்ங்களோ?)
https://youtu.be/Q4c_R91c5Rc
